Niet eerder uitgegeven.

Niet voorhanden.

Universis presentes litteras inspecturis magister Renerus, scholasticus ecclesie Tungrensis, reverendi patris domini Henrici, Dei gratia Leodiensis episcopi, in spiritualibus provisor, salutem in Domino et agnoscere veritatem.

Cum iam dudum inter virum nobilem Wilhelmum de Althena, prepositum ecclesie Cortersensis, ex una parte et decanum et capitulum eiusdem ecclesie Cortesensis ex altera mota esset discordia super diversisa articulis hinc et inde, tandem de consilio nostro sopita est huiusmodi discordia in hunc modum, videlicet quod predicti decanus et capitulum cesserunt et renuntiaverunt omni querele et litteris apostolicis et legatorum eius impetratis, quas habebant vel habuerunt usque ad tempus illud contra dominum de Althena dictum et absolverunt sive quittaverunt eundem ab omni damno sive iniuria, ab eo sive ab alio vel ab aliis de mandato suo eisdem illatis. Predictus vero Wilhelmus, dominus de Althena, in recompensationem omnium predictorum et pro salute anime sue et suorum predecessorum curiam quamdam iacentem iuxta ecclesiam Cortesensem, quam idem decanus et capitulum sub annua pensione quatuor modiorum hordei mensure Cortesensis tenebant, necnon et aliam quamdam curiam predicte curie adiacentem, quam ibidem allodialiter et perpetualiter contulit eisdem et ad opus eorum effestucavit et pensionem inde debitam perpetualiter quittavit, nihil iuris sibi vel suis heredibus retinendo. Idem vero decanus et capitulum se ad hoc obligaveruntb quod anniversaria tam suum quam antecessorum ipsius debitis officiis suis annuatim temporibus exequentur.

Item preterea de patronatu capelle de Bedborne ita est de consensu partium ordinatum quod ipsum ius patronatus, quod nos eidem capitulo per sententiam arbitralem olim adiudicavimus, eisdem decano et capitulo perpetualiter remanebit ita ut quotiescumque vacabit, eadem capella ipsi decanus et capitulum sacerdotem idoneum, non canonicum Cortesensem, in eadem capella instituent, qui in eadem capella debet personaliter residere et ibidem divina officia celebrare et integritatem reddituum ad eandem capellam spectantium absque diminutione percipere; qui etiam esse debet de iurisdictione decani et capituli ecclesie Cortesensis et horis canonicis in religione in ecclesia Cortesensi, quando circa divina officia in capella de Bedborne occupatus non fuerit interesse.

Item dominus vero Andreas, qui nunc est capellanus in eadem capella, ipsam capellaniam quamdiu dictus dominus de Althena voluerit, retinebit. Eo vero cedente, decedente vel amoto, idem decanus et capitulum alium, ut supra dictum est, ex tunc in antea de cetero instituet sacerdotem.

Item preterea dictus dominus de Althena recognovit quod ius patronatus ecclesie Cortesensis ad decanum et capitulum pertinet memoratos et taliter est compositum ut ipsi ex nunc et in antea de cetero sacerdotem non canonicum debent ad eam presentare, quem secundum Deum et bonam conscientiam dicte parochie noverint expedire,c previso tamen quod Nicolaus, qui nunc est investitus eiusdem ecclesie ibidem, quamdiu vixerit, debeat remanere, nisi aliud ecclesiasticum beneficium obtineat quo ad personalem residentiam teneatur.

Item de custodia Cortesensis ecclesie taliter est ordinatum quod a festo Nativitatis beati Iohannis Baptiste in antea quotiescumque dictam custodiam vacare contingat, sepedictus dominus de Althena eandem custodiam alicui de canonicis conferet, vel perpetualiter vel ad tempus, quod officium custodis tam in procurandis luminaribus quam in custodiendo thesaurum ecclesie fideliter exercebit, qui ministrum habebit ad hoc competentem.

Item ad altare Sancti Spiritus quoque ibidem decanus et capitulum quotiescumque vacaverit instituit sacerdotem, qui institutus debet predicto domino presentari et ipse ad hoc suum consensum tenebitur adhibere.

Item et campanarium et rectorem scholarum decanus et capitulum predicti instituent quotiescumque fuerit opportunum, quoniam inventum est quod hec hactenus facere consueverint.

Item cum autem omnia predicta coram nobis et ex nostra ordinatione et de consensu partium predictarum provide sint facta et ordinata in presentia militum et aliorum hominum domini predicti, nos ea quoad singulos articulos rata habentes et vice domini nostri Leodiensis episcopi, qua fungimur, confirmantes ut perpetuis temporibus illibata et inconvulsa persistant, in predictorum testimonium et muminen litteras presentes fecimus confici et nostri sigilli appensione roborari et mandamus partibus antedictis quod sigilla sua presentibus appendant.

Nos itaque decanus et capitulum antedicti et nos Wilhelmus de Althena, dominus prepositus ecclesie predicte, in signum nostri consensus premissis adhibiti et in testimonium omnium predictorum promissorum sigilla nostra presentibus duximus appendenda.

Actum et datum anno 1262, feria quinta ante festum beatorum apostolorum Simonis et Iude.